☀️ Një javë kryesisht me diell na përcolli në Kosovë, ndërsa zhvillimet politike ishin sërish në qendër të vëmendjes. Kushtetuesja konfirmoi Qeverinë dhe përcaktoi afatin për zgjedhjen e presidentit, ndërsa PDK procedoi ndryshimet për Ligjin e Speciales dhe protestat vazhduan në Prishtinë. Në sport, Kosova nis një kapitull të ri në Ligën e Kombeve, kurse në botë, Asambleja e OKB-së solli në një skenë tensionet rreth Gazës, Iranit dhe Ukrainës.

📧 Duam ta përmirësojmë vazhdimisht newsletter-in tonë dhe për këtë na duhet mendimi juaj, kemi përgatitur një pyetësor, i cili nuk iu merr më shumë se 1 minutë kohë dhe mund ta plotësoni duke klikuar këtu.

Gjykata Kushtetuese publikoi vendimin për kërkesat e PDK-së lidhur me konstituimin e Kuvendit dhe formimin e Qeverisë, duke konstatuar se Qeveria e udhëhequr nga Albin Kurti është zgjedhur në përputhje me Kushtetutën.

Sa i përket presidentit, Gjykata ka sqaruar se afati 60-ditor për zgjedhjen e tij ka nisur më 8 gusht dhe përfundon më 6 tetor. Për Kuvendin, Kushtetuesja ka konstatuar se ai është konstituuar më 13 shtator, por pas skadimit të afatit 30-ditor, dhe se deputetët duhet të zgjedhin edhe nënkryetarin e dytë.

Vendimi solli reagime të menjëhershme. PDK kërkoi që Kuvendi të mblidhet dhe të votojë projektligjin për Dhomat e Specializuara, ndërsa Ardian Gjini tha se afatet janë konsumuar dhe se vendi po shkon drejt zgjedhjeve.

Ndërkohë, analistët ngritën edhe pikëpyetje për hapat e ardhshëm. Eugen Cakolli pyeti se kush do ta caktonte datën e zgjedhjeve nëse presidenti nuk zgjidhet, ndërsa Ilir Deda vlerësoi se vendimi i Kushtetueses ndryshoi matematikën e skenarëve të mundshëm zgjedhorë.

Me Qeverinë të konfirmuar si kushtetuese, fokusi politik tani zhvendoset te zgjedhja e presidentit deri më 6 tetor dhe te përmbyllja e plotë e formimit të institucioneve.

Për më shumë informacione vazhdoni në rubrikën Lajme

Kosova po hyn në një kapitull të ri në Ligën e Kombeve, me një skuadër të ndryshuar dhe disa emra të rinj në dispozicion të Franco Fodës. Përzgjedhësi publikoi listën me Dion Kaçurin, Erblin Osmanin dhe Milot Avdylin si prurje të reja, duke sinjalizuar fillimin e një cikli të ri për Dardanët.

Paralelisht, Kombëtarja po përballet edhe me fundin e një epoke. Amir Rrahmani u pensionua nga Kosova, ndërsa më pas edhe Valon Berisha dhe Fidan Aliti i dhanë fund rrugëtimit me fanellën dardane.

Mes largimeve dhe emrave të rinj, fokusi tani është te fusha. Kosova nis sonte misionin e ri në Ligën e Kombeve ndaj Irlandës, me synimin për një start pozitiv dhe një fillim të ri në këtë cikël.

Për më shumë informacione vazhdoni në rubrikën Sport

Zhvillimet rreth Dhomave të Specializuara vazhduan të jenë në qendër të zhvillimeve politike edhe këtë javë. PDK dorëzoi në Kuvend kërkesën për plotësim-ndryshimin e Ligjit për Dhomat e Specializuara, duke propozuar një sërë ndryshimesh në funksionimin dhe mbikëqyrjen e këtij mekanizmi.

Sipas propozimit, PDK kërkon rikthimin e kompetencave të Gjykatës Supreme në Kosovë dhe mbikëqyrje ndërkombëtare, ndërsa Projektligji parasheh edhe kufizimin e dënimeve deri në 15 vjet dhe mundësinë e transferimit të rasteve në Kosovë.

Paralelisht, në sheshin “Skënderbeu” vazhduan protestat kundër aktgjykimit të Speciales ndaj katër ish-krerëve të UÇK-së, me qytetarët që për tetë netë me radhë u mblodhën nën moton “Jo në emrin tim”.

Në këtë atmosferë reaguan edhe familjet e Hashim Thaçit, Kadri Veselit dhe Jakup Krasniqit, të cilat iu përgjigjën u.d të presidentes Albulena Haxhiut pas ftesës së saj për takim.

Nga Kuvendi te protestat në shesh, çështja e Speciales vazhdon të mbetet një nga temat më të ndjeshme politike dhe shoqërore në Kosovë..

Për më shumë informacione vazhdoni në rubrikën Lajme

Asambleja e Përgjithshme e OKB-së në New York ishte në qendër të vëmendjes këtë javë, me liderët botërorë që adresuan luftërat, sigurinë dhe tensionet ndërkombëtare.

Lindja e Mesme zuri një pjesë të madhe të debatit. Donald Trump kërcënoi Iranin me “asgjësim”, ndërkohë që Washingtoni dhe Teherani zhvillonin bisedime në prapaskenë, ndërsa presidenti iranian kritikoi SHBA-në. Gaza ishte një tjetër temë kryesore, me Erdogan që kërkoi nisjen e menjëhershme të rindërtimit dhe Macron që e cilësoi të turpshme qëndrimin pasiv ndaj situatës atje.

Në fokus ishte edhe Ukraina, pasi Volodymyr Zelensky paralajmëroi se Vladimir Putin mund të sulmojë një vend të NATO-s. Ndërkohë, Erdoğan deklaroi se Evropa ka nevojë për Turqinë në arkitekturën e saj të sigurisë.

Trump tërhoqi vëmendje edhe me deklaratën se ka përfunduar tetë luftëra, duke përfshirë konfliktin Kosovë–Serbi, ndërsa veçoi Kosovën dhe Shqipërinë duke i falënderuar për angazhimin e trupave në Gaza.

Nga Gaza dhe Irani te Ukraina e siguria evropiane, New Yorku u shndërrua këtë javë në qendrën e diplomacisë dhe përplasjeve më të mëdha globale.

Për më shumë informacione vazhdoni në rubrikën Botë

“Shëndeti në rend të parë”: E ftuar ishte oftalmologia Mirlinda Kubati, e cila foli për strabizmin, dioptrinë te fëmijët dhe rëndësinë e kontrolleve të hershme të syve, duke shpjeguar pse diagnostikimi në kohë është vendimtar për trajtimin.

“Arena e Yjeve”: Gazetarët e Telegrafi Sport analizuan Kombëtaren e Kosovës para sfidave në Ligën e Kombeve, me fokus te pensionimet, prurjet e reja dhe ndryshimet që po pëson skuadra e Franco Fodës.

Për më shumë episode, vizitoni hapësirën për Podcaste

Për më shumë informacione vazhdoni në portalin Telegrafi